SEOANE, XAVIER / PEREZ, PERE (Ilustración)
Versos entre a lírica e a épica, o canto e a elexía. Unha viaxe pola historia dende as orixes, navegando por territorios espaciais e humanos, paisaxes e memorias. Un percorrido pola civilización atlántica: liberdade e dependencia, esperanza e esquecemento, identidade e aculturación. Ilustración de cuberta de ISAAC PÉREZ VICENTE
Entre a lírica e a épica, entre o canto e a elexía, Espiral de sombras explora a luz e a escuridade dunha utopía incumprida: Somos da mesma raíz que a terra e as palabras
Desde as orixes, pasando pola historia e polos seus avatares, Xavier Seoane indaga na tensión entre o que xa foi e o que pelexa por ser, nun contexto de globalización imparable que trae ata o presente as ameazas da perda e da demolición: Levántate, país de tódolos abraios, / de tódalas desfeitas
Coa paixón e co ritmo como armas e cunha vigorosa imaxinaría, este libro é unha navegación por territorios espaciais e humanos, paisaxes e memorias, tanto materiais como inmateriais. Unha viaxe, tamén, por unha civilización atlántica -á que se incorporan os nomes de escritores, artistas, editores contemporáneos- que abala entre a liberdade e a dependencia, a esperanza e o esquecemento, a aculturación e a identidade.
De composición sinxela -con trazos da poesía tradicional- e cunha linguaxe directa, está estruturado en tres partes: Corazón de maiola, Pan de raposo e Pedra da serpe.
Faktoría K retoma o ronsel literario da antiga colección Tambo -continuando con Luís Rei Núñez como coordinador- para seguir apostando por un xénero que conta en Galicia con voces ben destacadas. Na nova etapa, tamén se abre a autores doutras linguas, traducidos directamente para o galego.
Xavier Seoane (A Coruña, 1954) é profesor de Lingua e Literatura na Coruña. É un dos nomes máis recoñecidos da poesía galega dos anos oitenta, cunha traxectoria avalada por distintos galardóns. Colaborador de varias revistas, en especial Luzes de Galiza, que dirixiu xunto a Manolo Rivas, Seoane deuse a coñecer como poeta en 1981 con Os bosques encendidos, ao que seguiron títulos como Iniciación e regreso (1985), Eu tamén oín as voces do orvallo (1994), e Don do horizonte (1999).
