Joana Dalva vive cos seus pais, cun irmán pequeno, que é o neno máis pesado do mundo, e coa súa avoa, que pasa os días na cama sacando a pintura da parede coas unllas e que non se decata do que pasa ao seu redor. Este é o ambiente no que vive unha rapaza que soña con ser escritora. Un día fai unha redacción sobre Xoana de Arco e provoca unha reviravolta na historia e nela mesma. Se unha simple redacción podía cambiar o pasado, por que non usar a literatura para cambiar o presente? Joana Dalva non dubida en converter a ficción en realidade. O problema é que cada texto que ela escribe provoca consecuencias imprevistas, orixinando outros textos que traen novos problemas. É o xogo do gato e do rato que acaba escapando do seu control. Para participar nese xogo non é preciso ter a idade de Joana Dalva, nin sentir na pel os conflitos e as espiñas da adolescencia. Esta novela de Sérgio Klein, que obtivo enorme éxito no Brasil, é para todos os lectores e lectoras que cren no poder transformador das palabras.
Sérgio Klein (1963-2010). Naceu no Brasil na cidade de Sete Lagoas, autor de contos e poemas premiados no Brasil e no exterior, recibiu o Premio Casa de América Latina, outorgado pola Radio France Internacionale de París. Co volume de "Palabras cruzadas", obtivo o primeiro lugar no Concurso Nacional de Literatura Cidade de Belo Horizonte en 2002. En galego ten publicado até o momento dous volumes da súa serie Poderosa: Poderosa (Xerais 2008), Poderosa 2 (Xerais 2009) e Poderosa 3 (Xerais 2011).
