Todas as familias felices se parecen, máis cada familia é desgrazada dun xeito diferente. Coma nun encrucillado, en O imposible de desatar os lectores van ir compoñendo a historia dunha familia de hoxe. A dunha semana da súa vida, desde o almorzo á noite, para descubrir a verdade que hai detrás dos xestos nimios e as medias palabras. Para compartir sentimentos ocultos e revelar o sentido dos silencios. Cun novo e sorprendente xeito de narrar, Iván García Campos traza o retrato da cara oculta da sociedade actual.
Iván García Campos (A Coruña, 1974) obtivo en 2008 o Premio Nacional de Narracións Curtas Modesto Rodríguez Figueiredo, instituído pola Fundación do Pedrón de Ouro, pola súa obra Unha casa chea de xanelas. Coa súa primeira novela, O imposible de desatar, acaba de recibir o Premio Blanco Amor.
