NEIRA VILAS, XOSÉ
Neste libro, o autor de Memorias dun neno labrego reúne un mangado de lembranzas sobre o seu amigo, o editor e escritor Francisco Fernández del Reigo, a carón da correspondencia que con el se conserva. Trátase dunha comunicación cruzada entre a cidade de Vigo, onde residía o editor, e Buenos Aires, A Habana e a aldea natal de Gres, os "tres mundos" de Neira Vilas. Corenta e seis anos de vencello epistolar nun libro de homenaxe á amizade no que a escritura se traza sobre a urda do tempo.
Neira Vilas (Vila de Cruces, 1928) é sen dúbida un dos escritores máis sobranceiros do noso país. A súa vida e a súa obra están marcadas pola emigración, que el viviu en primeira persoa en Arxentina e Cuba. Dese sentir nace Memorias dun neno labrego, un dos libros máis famosos das letras galegas. A mestría do Neira Vilas narrador amósase nese e noutros moitos libros que lle valeron o recoñecemento da sociedade galega.
Ao longo da súa vida Neira Vilas recibiu numerosos galardóns, como por exemplo a Medalla Castelao en 1988. Nos Premios da Edición que concede a AGE recibiu o Premio Xosé María Álvarez Blázquez ao autor do ano 2010.
Saber máis »