Ao pé do abismo é a engaiolante prosa xornalística de Rosa Aneiros e inclúe textos tan deslumbrantes como «A última vaca», premio Caixanova Francisco Fernández del Riego de Xornalismo. Literatura e xornalismo, realidade e ficción.Velaquí un xogo de equívocos. A verdade mestúrase coa mentira pero nunca sabemos cal é cal. O lindeiro entre a literatura e o xornalismo fica esvaecido polo neboeiro dos datos, das aparencias, da credibilidade, dos nomes, da estrañeza, da obxectividade sempre subxectiva de quen olla. Son retallos que navegan entre a realidade e a ficción, un baile arriscado ao pé do abismo, unha singradura por memorias e teimas. Por horrores e fascinacións. Por paisaxes e persoas. Dos terribles titulares de prensa ao nordés que varre o rostro na Frouxeira. Das estatísticas que anulan os rostros á ollada de Carol nunha favela de Brasil. Das perlas que se perden no maremoto de Asia ao silencio de area do pobo saharauí. Do sabor clorofila do tabaco en Viñales ao debuxo dunha bandada de estorniños na Coruña. Todas estas mentiras e verdades fican atadas tan só por un fío de herba. É un mollo de emoción que talvez nos permita atrapar por uns segundos o efémero e aturuxador cotío que sempre nos foxe. A realidade nunca estivo tan lonxe. Ou non.
Rosa nace en Valdoviño en 1976. É unha das voces máis novas dentro do panorama literario galego deste comezo de século.
É filologa licenciada pola Universidade de Santiago de Compostela e traballa no ensino secundario en Lugo, actividade que comparte co seu traballo na sección de literatura no Consello da Cultura Galega.
A pesar da súa xuventude ten publicadas varias obras de relevancia nas nosas letras: Lorenzo Varela en revistas culturais de México e Bos Aires, Veu visitarme o mar, O xardín da media lúa e Resistencia.
Voz activa e inagotable na Plataforma Nunca Máis e guionista do filme que se fixo dende ela: Hai que botalos.
