LÓPEZ LÓPEZ, XABIER / UHÍA LIMA, MANUEL (Ilustración)
No canellón da peixería naceu un día un gatiño branco, pequerrechiño e perrenchudo, que para desgusto dos seus papás deu en dicirlle aos demais gatos algo realmente sorprendente: «Son un can!». Os seus veciños escachaban a rir. «Un can? Disque es un can?». Pois si, insistía o noso amigo. «UN CAN!».
Xabier López López (Bergondo, 1974) é avogado. Publicou a súa primeira obra literaria, Biff, Bang, Pow! (Novela case negra), no ano 1997. Logo da boa acollida desta orixinal parodia do xénero detectivesco ateigada de referencias ao mundo do cinema, acadou unha especial repercusión crítica coa novela Doutor Deus, situándose entre os narradores galegos dos noventa que integran no seu discurso un afán de renovación e unha necesidade de se vencellaren á narrativa contemporánea universal. Posteriormente con O caderno, obtivo o Premio Risco de Literatura Fantástica 2001 e, ao ano seguinte, o Lueiro Rey de Novela Curta con O mono no espello. A estraña estrela mereceu unha tradución ao portugués. A vida que nos mata recibiu o Premio García Barros 2003. En 2007 publicou, tamén en Galaxia, Trinta e dous dentes, que foi finalista do Premio Torrente Ballester.
