Antonio Manuel Fraga Allegue naceu en Nogueirosa (Pontedeume) en 1976. Estudou Enxeñaría Técnica Industrial en Ferrol, mais a vida teimaría por levalo cara ao eido das letras. Xa afincado no barrio coruñés de Monte Alto, en 2013 gañou o Premio Merlín de Literatura Infantil coa obra «O Castañeiro de Abril». Posteriormente publicou en Xerais «Tártarus» (2016), na colección Fóra de Xogo, e «Escaquis e Romeu» (2018), na colección Sopa de Libros. Coa obra «O bestiario científico de Anxos Nogueirosa» (2108) obtivo o I Premio María Victoria Moreno de Literatura Xuvenil. Este mesmo título foi elixido mellor obra xuvenil de 2019 na Gala do Libro Galego. En 2020 acadou o premio Jules Verne de Literatura Xuvenil coa obra «santoamaro» e en 2021 publica, na colección Merlín, «Papá caníbal». Algúns dos seus títulos foron traducidos a idiomas como o castelán, inglés, catalán ou éuscaro.
