GARCÍA TEIJEIRO, ANTONIO / COBAS, XOSÉ (Ilustración)
Un rato díxolle á lúa é a caixa dos tesouros da poesía de Antonio García Teijeiro. Dentro dela gárdase a esencia dos seus versos, a apócema máxica coa que, en palabras de Fran Alonso, «a lúa imprimiu neles un sabor antigo, un sabor de berce, un sabor sincero que se nos mete dentro». García Teijeiro atesoura no seu haber 25 anos escribindo poesía infantil. Desde a publicación de Nenos (1988), os seus versos enredan nos beizos dos lectores e lectoras, «divertidos, lúdicos, pero tamén facéndonos sentir, e pensar, turrando de nós cos seus ventos de ideas e emocións brincadeiras». Un rato díxolle á lúa espreme, antologados por Fran Alonso, eses 25 anos de poesía infantil.
«Simpáticos, fermosos, divertidos, sensibles, punzantes, libres, salgados, máxicos, outonizos, perennes», estes poemas transmiten emoción, beleza e solidariedade. Ilustrada por Xosé Cobas e musicada por Paco Ibáñez (nun CD que se acompaña), a poesía de Antonio García Teijeiro agroma cunha enorme forza natural, chea de vida, de luz e de musicalidade.
(Vigo, 1952). Mestre e escritor especializado en literatura infantil e xuvenil. É autor de obras didácticas, poesía e narrativa, entre as que destacan Na fogueira dos versos (Premio Merlín 1996), A chave dos soños, Unha chea de aloumiños e Palabras envoltas en cancións. En 1998 recibiu o Premio Europeo Pier Paolo Vergerio.
Recibiu en 2007 o Premio Luna del Aire de Poesía Infantil pola obra Estela de versos, escrita conxuntamente con Rafael Cruz Contarini.
