MARTÍNEZ GONZÁLEZ, XURXO
Luís Soto é apenas un descoñecido para a maioría da sociedade galega e con el vai parte do noso pasado. Esta obra afonda na súa vida e no seu tempo: o sindicalismo da ATEO e o PCE na II República, Castelao e a UXT na Guerra Civil; a Comisión Galega do PCE e a Internacional do Ensino na posguerra; o Consello de Galiza e a JSUN; o Padroado da Cultura Galega e Vieiros no exilio; a fundación da UPG, a súa teoría e pensamento; a crise do 76 na UPG e o nacemento do PGP. En todo isto, Luís Soto foi parte protagonista.
O autor acudiu ao fondo Luís Soto (no Arquivo Histórico Provincial de Ourense), practicamente inédito, para realizar unha biografía que se botaba en falta. Xurxo Martínez González incorpora ao libro nova documentación sobre o exilio, o nacionalismo ou a revista Vieiros. Outros arquivos, co descubrimento de novos papeis, completaron unha obra necesaria para comprendermos mellor a esquerda, o exilio en México, a cultura e o nacionalismo galegos.
Unha peza imprescindible para encaixar a historia máis recente.
Xurxo Martínez González (Coia-Vigo, 1984). Doutor en Filoloxía Galega e premio extraordinario de Tese de Doutoramento pola Universidade de Vigo. A súa investigación céntrase no Rexurdimento, no provincialismo e na cultura galega do século XIX, con distintas publicacións e artigos. É autor dos libros " Fuco Gómez " (AGER, 2007) e " Luís Soto. A xeira pola unidade galega " (Xerais, 2011), así como de varios traballos sobre Ramón Villar Ponte. En colaboración con Emilio Xosé Ínsua escribiu " Común temos a patria. Biografía dos irmáns Villar Ponte " (Xerais 2018). Colabora acotío coa prensa ( " Praza Pública " ou " Faro de Vigo " ) e recibiu varios premios literarios de poesía e relato. Traballa como técnico de normalización lingüística no Concello de Redondela.
