PERNAS CORA, GUSTAVO
Nunha cidade baixo cero, oito personaxes que transitan pola rúa escapan da súa rutina e aparcan os seus problemas para deixarse engaiolar por unha raiola de sol. Lonxe soa un estrondo de explosións pero eles déixanse quentar, non reaccionan. Cruzan anacos das súas voces interiores pero non dialogan. Móvense polo espazo na procura dos raios fugaces pero non actúan. O mesmo sol que os acubilla vainos atrapando mentres as bombas soan cada vez máis cerca... Son oito personaxes baixo unha mesma presión social, baixo a mesma presión atmosférica. Isóbaras é un mapa de temperaturas do noso tempo.
Gustavo Pernas Cora (Viveiro, 1959) é licenciado en Historia da Arte pola Universidade de Santiago de Compostela. Desde 1985 dedícase profesionalmente ao teatro, combinando traballos de actor en diferentes compañías co traballo de dirección e escrita dramática. Profesor de Guión e Teatro na Escola de Imaxe e Son da Coruña. En 1989 funda con Ánxela G. Abalo a compañía de teatro Ancora Produccións na que dirixe e interpreta os seus propios textos. Entre outras, estreou e publicou as seguintes obras: O Galego, a Mulata e o Negro; a triloxía Comedias Paranoicas (formada por Ladraremos, Fábula e Anatomía dun Hipocondríaco); Sucesos; Footing; Paso de Cebra; Final de Película; Medidas Preventivas; Taras Mínimas; ou a triloxía 3 Logomonos (formada por Colgados, Pisados e Snakizados). Recibiu, entre outros, os premios Max de las Artes Escénicas, Rafael Dieste, María Casares, Compostela, AELG (Asociación de Escritores en Lingua Galega), Roberto Vidal Bolaño e Maruxa Villanueva. Algunhas das súas obras foron publicadas ou estreadas en Francia, Portugal ou Uruguai.
